د پوهنې وزارت سرپرست د هرات ولایت د دیني مدارسو له علماوو او مسئولینو سره وکتل
د پوهنې وزارت سرپرست الحاج مولوي حبیب الله آغا، په داسې حال کې چې د یاد وزارت د بهرنیو اړیکو رئیس استاد وحیدالله هاشمي او د هرات ولایت پوهنې رئیس مولوي رحمت الله جابر یې هم ملتیا کوله، د یاد ولایت د دیني مدارسو له مسئولینو او استادانو سره په کتنه کې، د اسلامي زده کړو بنسټونو د کړنو د لاښه والي په اړه تفصیلي خبرې وکړې.
د پوهنې وزارت سرپرست د هرات له علماوو سره په کتنه کې د خوښۍ د څرګندولو ترڅنګ وویل؛ د اسلامي زده کړو د مرکزونو په ګډون د ټولو ښوونیزو بنسټونو پراختیا ته پاملرنه د پوهنې وزارت له لومړیتوبونو څخه ده، چې د پوهنې وزارت رهبري ورته ژمنه ده.
نوموړي د خپلو خبرو په یوه برخه کې د ټولنې په اصلاح کې د علماوو رول ته اشاره وکړه او له هغوی یې وغوښتل، تر څو د خلکو په منځ کې له خپل معنوي نفوذ څخه په استفادې سره د ښو اخلاقو، یو بل منلو او د ملي یووالي د ټینګښت لپاره لازیاتې هلې ځلې وکړي.
په یاده کتنه کې یوشمیر علماوو او استادانو د موضوع په مرکزيت خبرې وکړې او له علماوو سره یې د کتنې په ګډون، دغه ولایت ته د پوهنې وزارت د سرپرست له سفر څخه خوښي څرګنده کړه.
په پای کې د دیني زده کړو بنسټونو مسئولینو خپل نظریات او یو شمیر وړاندیزونه د پوهنې وزات مشرتابه ته وړاندې کړل، د پوهنې وزارت د مشرتابه له لوري د همکاري ژمنه ورسره وشوله.
