د هېواد په شمالي ولایتونو کې د نشراتي مدیرانو او د کتابونو د وېش مسئولینو د مسلکي ظرفیت لوړولو په موخه سیمینار دایر شو
د پوهنې وزارت د نشراتو او عامه اړیکو ریاست په استازیتوب د ګمارل شوي ټېم له لوري، د هېواد د ۹ شمالي ولایتونو (بدخشان، بلخ، جوزجان، سرپل، فاریاب، بغلان، کندز، تخار او سمنګان) نشراتي مدیرانو او د کتابونو د وېش مسئولینو لپاره دوه ورځنی علمي او مسلکي سیمینار جوړ شو.
په یاد سیمینار کې ګډون والو ته د خبرونو او راپورونو ورکولو تخنیک، په معیاري ډول د عکسونو او خبري کلېپونو اخیستلو ځانګړی روش، د درسي کتابونو د وېش طریقې، اداري کړنلاره، د پوهنې وزارت د پروګرامونو او پلانونو په اړه د خلکو د خبرولو د لارو چارو په اړه معلومات، د تبلیغاتي کمپاینونو پوهه او داسې نور مهم مسایل د پریزنټیشنونو تر څنګ، د معتبرو علمي او مسلکي سرچینو په کارولو سره د سلایډونو په بڼه وړاندې شول.
د سيمينار په وروستۍ ورځ د بلخ ولايت پوهنې رئيس الحاج مولوي عبدالجليل شهیدخېل د ياد سيمينار ګډون والو ته د تصدیق پاڼو د وېش په مراسمو کې، د پوهنې وزارت د نشراتو او عامه اړيکو رياست پلاوي ته ښه راغلاست ووايه او د دغه ډول سیمینارونو په لاره اچول یې د اړوندو ادارو د کارکوونکو د مسلکي وړتیاوو په لوړلو کې خورا مهم وبلل.
په پاى کې د سيمينار يو تن ګډون وال د نورو په استازيتوب، د پوهنې وزارت د نشراتو او عامه اړيکو رياست مشرتابه هيئت او د یاد سيمينار وړاندې کوونکي ټېم له هلوځلو څخه قدرداني وکړه او د ورته ښوونیزو پروګرامونو د دوام هيله يې وکړه.
