د کابل ولایت د متشبث زده کوونکو د لاسي تولیداتو نندارتون جوړ شو

د کابل ولایت پغمان ولسوالۍ د خواجه مسافر عالي لېسې ادارې، د تشبث ښوونیزې او روزنیزې مؤسسې په همکارۍ، د متشبث زده کوونکو د تولیداتو نندارتون جوړ کړ.
په یاد نندارتون کې چې د خواجه مسافر عالي لېسې د زده کوونکو لاسي صنایع نندارې ته اېښودل شوي ؤ، پکې د پوهنې یو شمېر مسئولینو، متشبثینو او یو شمېر مسلکي کسانو برخه اخیستې وه.
د پغمان پوهنې ریاست مسئولینو د یاد پروګرام له تنظیم څخه د مننې تر څنګ، دغه نندارتون د ځوانانو د استعدادونو د ودې او د ټولنې د پر ځان بسیاینې لپاره یو ښه فرصت وباله.
د پغمان ولسوالۍ د خواجه مسافر عالي لېسې د آمر په وینا، د یادې لېسې زده کوونکي له تېرو څو کلونو راهیسې په خپل ځانګړي استعداد سره د چارچ بطرۍ، د چرګوړو  ایستلو ماشین، پاور بانک، برېښنایي جارو، واټرپمپ، برېښنایي سولر، د کالیو مینځلو ماشین، برېښنایي داشونه او نور مهم وسایل جوړ کړي دي، چې په ورځني ژوند کې د دوی د لوړ خلاقیت او نوښت ښکارندویي کوي.
په پای کې نوښتګر زده کوونکي د مسئولینو له لوري وستایل شول.