له ولايتونو څخه د ځینو لنډو خبرونو انعکاس
غزني
د غزني ولایت پوهنې رئیس الحاج مولوي میرنصیر احمد حسیني د ياد ولایت مقر ولسوالۍ ته د یوه کاري سفر په ترڅ کې، د دغه ولسوالۍ له ولسوال، د پوهنې له مسئولینو او علماوو سره د لیدنې پر مهال د ښوونې عمومي وضعیت وڅیړه.
نوموړي د يادې ولسوالۍ د ښوونيز حالت د لاښه والي په موخه د همکارۍ غوښتنه وکړه.
هلمند
د هلمند ولایت لښکرګاه ښار د عبدالصمد روحاني لېسې ادارې له زده کوونکو او ځايي خلکو څخه شاوخوا اته زره جلده اضافي کتابونه راټول او د ياد ولایت پوهنې ریاست ته یې وسپارل، څو نور زده کوونکي ترې ګټه واخلي.
لغمان
د لغمان ولایت پوهنې رئیس مولوي شاه جهان ساجد او د ياد رياست د انجنيرانو ټېم د دغه ولایت په الیشنګ ولسوالۍ کې د یو شمېر ښوونځیو د بیارغونې چارې چې د یونیسف مؤسسې په مالي مرسته ترسره کيږي، څارنه وکړه.
ننګرهار
د ننګرهار ولایت پوهنې رئیس مفتي حبیب حضرت حقاني د ياد ولایت په مرکز جلال اباد زندان کې د سواد زده کړې د کورسونو له تدریسي بهیر څخه څارنه وکړه.
نوموړي د سواد زده کړې طرز او د ښوونکو د تدریس طریقې وڅېړلې او د ستونزو په حل کې یې د همکارۍ ژمنه وکړه.
جوزجان
د جوزجان، نیمروز او لوګر ولایتونو د پوهنې ریاستونو له لوري د پوهنې، عامې روغتیا، د کلیو د بیارغونې او پراختیا ریاستونو د مسئولینو په ګډون په جلا جلا غونډو کې، د لاسونو مینځلو نړیواله ورځ ولمانځل شوه او په ورته مهال په يادو ولايتونو کې د کولمو چنجيو د له منځه وړلو کلنی کمپاین هم پیل شو.
د يادو ولايتونو د عامې روغتيا او پوهنې رياستونو استازو د اسلام له نظره د پاکوالي په اړه خبرې وکړې او له خلکو يې وغوښتل، چې په کورونو او چاپېريال کې د ناروغيو د خپرېدو د مخنيوي په موخه پاکوالي ته لازمه پاملرنه وکړي.
