د ولایتونو ښوونیزو کړنو ته لنډه کتنه
سرپل
د سرپل ولایت پوهنې رئیس مولوي محمد رحماني، د یاد ولایت د جوګي قوم د ماشومانو لپاره، د سواد زده کړې د کورسونو له فعالیتونو څخه څارنه وکړه.
نوموړي د يادو ټولګيو د زده کوونکو پر سالمې روزنې د ټينګار ترڅنګ، د ښوونيزو توکو په وېشلو سره هغوى زده کړو ته وهڅول.
بغلان
د بغلان ولايت پوهنې رياست له یو شمېر نوماندانو څخه ډله ييزه آزموينه واخيسته.
په پام کې ده، د دوی له ډلې ۵۰ تنه هغه نوماندان چې معیاري نمرې ترلاسه کړي، د یاد ولايت په خصوصي ديني مدارسوکې به د استادانو په توګه وګمارل.
کاپیسا
د کاپیسا ولایت پوهنې رئیس مولوي محمد فرید حقاني او ورسره مل پلاوي، د یاد ولایت مرکز اړوند د یو شمېر ښوونځیو او دارالاېتامونو فعالیتونه له نیږدې وڅېړل او د یادو ښوونیزو بنسټونو ستونزې یې را ټولې او د حل په موخه یې د همکارۍ ژمنه وکړه.
لوګر
د لوګر ولایت پوهنې ریاست د یوې ډلییزې آزموینې په ترڅ کې، له ۴۵۰ نوماندانو څخه رقابتي آزموینه واخیسته.
د آزموينې کمېټه په پام کې لري چې د یاد ولايت په لېرې پرتو ښوونځيو کې ١٥٠ هغه کسان وګماري چې د دې پروسې شرايط يې پوره کړې وي.
بادغیس
د بادغیس ولایت پوهنې ریاست د یاد ولایت په خصوصي مدارسو کې د ۱۷۷ خالي بستونو د ډکولو په موخه، د ډله ییزې آزموینې پروګرام پیل کړ؛ ترڅو وړ کسان په دندو وګمارل شي
