له ولایتونو څخه د پوهنې خبرونو ته یوه کتنه
پنجشېر
د پنجشېر ولايت پوهنې رئیس مولوي غلام ایشان حماس، د یاد ولايت مرکز اړوند د سنګانه نارينه او ښځينه وو لېسو فعاليتونه وڅېړل .
نوموړی وايي: چې غواړي د یاد ولايت د ښوونځيو ستونزې له نیږدې وګوري او د حل لپاره يې پر وخت اقدام وکړي.
هرات
په هرات ښار کې د دیني مدارسو او ښوونځیو په کچه د پوهنې، ښاروالۍ او اطلاعاتو او فرهنګ ریاستونو ترمنځ درۍ اړخیز هوکړه لیک لاسلیک شو.
د یاد هوکړه لیک د لاسليکولو موخه، د ښوونځيو او ديني مدارسو د تعليمي ادارو او چاپېريال پاک ساتل دي.
لوګر
د یوه نړۍ وال مرستندویه بنسټ له لوري، د لوګر ولایت له پوهنې ریاست سره د ۱۷ زره امریکایي ډالرو په ارزښت د ښوونیزو توکو مرسته وشوه.
د لوګر پوهنې ریاست مشرتابه، د يادې ادارې له مرستو مننه وکړه.
د یو بل خبر له مخې:
د لوګر ولایت پوهنې ریاست د ښوونیزې ټکنالوژۍ او ساینس مرکز، د یاد ولایت د برکي برک ولسوالۍ د غازي امین الله عالي لېسې ادارې ته، د ۷۰۰ زره افغانیو په ارزښت ۱۴ کمپیوټرونه ووېشل.
