له ولایتونو څخه د پوهنې څو لنډو خبرونو ته کتنه
زابل
د زابل ولایت پوهنې رئیس الحاج مولوي ګل ولي متقي د ياد ولایت په مرکز کلات ښار کې د ملای د لېسې له نوې ودانۍ څخه چې په دې وروستیو کې د UNHCR د دفتر له لوري جوړه شوې وه، لیدنه وکړه.
د پوهنې رئيس د ښوونځيو له وسايلو او درسي خونو څخه د ليدنې په ترڅ کې له مسئولينو او زده کوونکو څخه وغوښتل، چې د ښوونځي ودانۍ او د وسايلو ساتنې ته جدي پاملرنه وکړي.
نورستان
د نورستان ولايت د پوهنې رئيس مولوي تاج محمد مطمئن د ياد ولايت د کامدېش ولسوالۍ د کشتوز کلي له خلکو سره د کتنې پر مهال، د پوهنې وضعيت وڅېړه او له قومي مشرانو او خلکو يې وغوښتل چې د تعلیمي بنسټونو د فعال ساتلو په برخه کې له پوهنې رياست سره همکاري وکړي.
همدارنګه،
د پوهنې رئیس له لورې مفتي حق نواز د نورستان د برګمټال ولسوالۍ اړوند د سيد شهدا دینی مدرسي د آمر په توګه د يادې مدرسې اداري او تدريسي کار کوونکو ته ور وپېژندل شو.
هرات
د هرات د پوهنې ریاست د مسئولینو په حضور کې د سلطان غیاث الدین غوري لېسې زده کوونکو ته د پوهاوي پروګرام پیل شو.
د یاد ریاست د ښوونې او روزنې آمر وويل، د ورته پوهاوي پروګرامونو جوړولو هدف په ټولنه کې د ځوانانو د فرهنګ، اسلامي ارزښتونو او يووالي لپاره ارزښتمند او ضروری یاد کړل.
پروان
د پروان ولایت پوهنې ریاست له لورې د ۱۴۰۲ کانکور آزموینې لپاره د نوماندانو د بایومټریک معلوماتو د ثبت بهیر د آزموینو ملي ادارې او د ياد ولایت پوهنتون په همکارۍ پیل شو.
د پروان پوهنې ریاست مسئولینو په وینا؛ د نوماندانو د بایومټریک پروسې له پای ته رسېدو وروسته به، د دیني مدارسو د دولسمو ټولګيو د کانکور، د عاليه،خامسه دورو سربېره د څورلسمو ټولګيو د تثبيت آزموینې هم واخیستل شي.
