له ولایتونو څخه د پوهنې لنډ خبرونه
پروان
د پوهنې وزارت د اسلامي زده کړو معینیت د دارالعلومونو ريس مولوي عبدالقدوس قدوسي او ورسره مل پلاوي د پروان ولايت د جهادي مدرسې د ازموينې د څارنې پر مهال د يادې مدرسې اداري او تدريسي چارې یې هم وڅېړلې د تدریسي بهیر د ښه والي په موخه یې مسوولینو ته لازمې لارښوونې وکړې.
پکتیکا
سویډن موسسې د پکتیکا ولایت د پوهنې ریاست په مرسته د دې ولایت په تروې ولسوالۍ کې تر خپل کنترول لاندې د سیمه ییزو ښوونځیو د ۲۵ تنو ښوونکو لپاره د ظرفیت لوړونې سیمینار جوړ کړ.
د يادې شوې ولسوالۍ د پوهنې آمر دغه پروګرام يو ښوونيز فرصت وباله او له ګډونوالو يې وغوښتل، چې د دغه سيمينار له موادو او محتوا څخه د امکان تر حده استفاده وکړي.
لغمان
د پوهنې وزارت د اسلامي زده کړو معینیت د استعدادونو د ارزونې رئیس مفتي عبدالولي سداد په داسې حال کې چې د لغمان ولایت د پوهنې رئیس مولوي شاه جهان ساجد هم ورسره ملتیا کوله، د دغه ولایت له مرستیال والي مولوي سعید احمد بنوري سره وکتل. او د دغه ولايت د دولتي او خصوصي مدارسو د تدريس او اداري چارو د څارنې، کتنې او څېړنې په باب خبرې وکړې.
په دې برخه کې د لغمان مرستیال والي له دوی سره د هر ډول مرستو ژمنه وکړه.
هرات
په دې وروستيو کې مولوي اسمعيل مظفري د هرات د پوهنې ریاست د مالي او اداري آمر په توګه او مولوي عبدالحکيم خادمي د بشري سرچينو د پراختيا د عمومي مدیر په توګه ټاکل شوي دي. د هرات د پوهنې ريس مولوي عبدالله اميني له هغوى څخه وغوښتل چې د پوهنې په برخه هېواوالو ته په ښه شکل چوپړ وکړي.
جوزجان
د جوزجان ولایت د پوهنې رئیس الحاج مولوي محمد طاهر جواد د دغه ولایت د خصوصي مدارسو سره د همغږۍ په غونډه کې له مسوولینو وغوښتل، چې خپلې ټولې چارې د پوهنې له ریاست سره په همغږۍ ترسره کړي، د ماشومانو لپاره د زده کړو د پراختیا په برخه کې هڅې وکړي او د راتلونکي نسل لپاره د پوهنې په برخه کې په ښه شکل خدمت وکړي.
