له ولایتونو څخه د پوهنې لنډ خبرونه
پروان
په پروان ولایت کې د یونیسف سیمه ییز دفتر د دغه ولایت له پوهنې ریاست سره د ۱۲۴ خیمو مرسته وکړه.
د دغه ولايت د پوهنې رئيس مفتي محمد حسن حقاني د دې ادارې له دوامداره مرستو څخه مننه وکړه او زياته يې کړه: د دغو خيمو په وېشلو سره به د پروان ولايت د هغو ښوونځيو ستونزې هوارې شي، چې درسي خوني نه لري.
کندهار
د کندهار ولایت د میوند ولسوالۍ د العربیه فتح العلوم الشریعه له مدرسې څخه د یو شمېر فاضلانو او حافظانو د فراغت په مناسبت لویه غونډه جوړه شوه.
د غونډې ګډونوالو فاضلانو ته د فراغت د مبارکۍ ترڅنګ له خلکو وغوښتل، چې د هېواد د پوهنې له نظام څخه بشپړ ملاتړ وکړي.
نیمروز
د HRRAC سیمه ییز دفتر تر خپل کنترول لاندې د سواد زده کړو لپاره د ۶۷ تنو ښوونکو د استخدام په موخه د نیمروز ولایت په کنګ، چخانسور، چهار برجک او خاشرود ولسوالیو کې ازادې سیالۍ ترسره کړې.
د دې ولايت د پوهنې رئيس حاجي مولوي ګل احمد حقاني له يادې ادارې څخه مننه وکړه، چې په ولايتونو کې يې د سواد زده کړې ټولګي جوړ کړي دي.
سرپل
د سرپل ولایت د پوهنې ریاست د عمومي زده کړو آمر مولوي هدایت الرحمن د دغه ولایت د صیاد ولسوالۍ د ۵ ښوونځیو د ازموینو له بهیر او همدا رنګه له اداري او تدریسي چارو څخه څارنه وکړه.
نوموړي د يادو ښوونځيو له زده کوونکو سره په ليدنه کې هغوی یې وهڅول چې په خپلو زده کړو کې لا زياتې هڅې وکړي.
