له ولایاتو څخه د پوهنې خبرونه

پروان:
 د پروان ولایت د پوهنې ریاست څخه په خپره شوې خبرپاڼه کې ویل شوي، چې آغا خان بنسټ د څه باندې یو میلیون او ۳۰۰ زره افغانیو په ارزښت یې د ورزشي وسایلو، کتابچو، میزونو او څوکیو او د ښوونځيو د اړتیا وړ نور توکي د پوهنې له ریاست سره په همغږۍ اخیستي دي، چې د دې ولایت په شیخ علي او سرخ پارسا ولسوالیو په ۳۰ ښوونځیو باندې ووېشل شول.
 د ياد شوي ولايت د پوهنې رئيس مفتي محمد حسن حقاني د يادې شوې ادارې له مرستو مننه وکړه او د يادو ښوونځيو له مسوولينو يې وغوښتل، چې مرستو شویو وسایلو ساتنې او پالنې ته جدي پاملرنه وکړي.
خوست:
د خوست ولايت د پوهنې رياست رهبري پلاوي د دغه رياست د يو کال د فعاليتونو او لاسته راوړنو راپور یې د آزادۍ مينې لېسې او د غرغښت مرکزي لېسې د فراغت په مراسمو کې وړاندې کړ او د راتلونکو ښوونيزو پروګرامونو په اړه يې هم خلکو ته معلومات ورکړل.
فراه:
د فراه ولایت د پوهنې ریاست چارواکي وايي، ابرار موسسې د یونیسف د سیمه ییز دفتر په مالي مرسته یې د دغه ولایت په ګلستان والسوالۍ کې ۴۵ سیمه ییز، ښوونیز ټولګي جوړ کړي چې په دغو ټولګیو کې به ۱۵۸۰ تنه ماشومان زده کړې وکړي.
سرپل:
د سرپل ولایت د پوهنې رئیس مولوي محمد رحماني وايي: د دې ولایت د مرکز او ولسوالیو د بېلابېلو ښوونځیو د ښوونکو او کارکوونکو لپاره د ژمنیو رخصتیو په پام کې نیولو سره، د دیني زده کړو حلقې جوړې شوې چې له دې فرصت څخه په استفادې سره به د دیني پوهاوي کچه لوړه کړي.
له همدې ولایت څخه یو بل خبر هم په ډاګه کوي:
د سرپل ولایت د کوهستاناتو والسوالۍ د عمومي زده کړو ۹۴ تنو ښوونکو ته د اکتید ولایتي دفتر په مرسته د لومړنیو مرستو، اروا پوهنې، رواني روغتیا او رواني ټولنیز ملاتړ، د ماینونو او چاودیدونکو توکو د خطرونو د مخنیوي د روزنې تر عنوان لاندې اته ورځنی سیمینار جوړ شو.