له ولایاتو څخه د پوهنې لنډ خبرونه

میدان وردګ:
د پوهنې وزارت د دعوت او ارشاد رياست مسوولينو د يوې غونډې په ترڅ کې د ميدان وردګو ولايت د پوهنې رياست له ريس او کارکوونکو سره وکتل، چې په دې غونډه کې د دعوت او ارشاد رياست د تاسيساتو او دندو په اړه يې معلومات وړاندې کړل. او هغوی ته یې ځینې لارښوونې هم ورکړې او د پوهنې ریاست له رهبرۍ څخه یې وغوښتل، چې د پوهنې وزارت د دعوت او ارشاد ریاست له لوري چاپ شوی کتاب د دغه ولایت د پوهنې ریاست کارکوونکو ته تدریس کړي.
کندهار:
د يونيسف او کوار ولايتي مسوولينو (واش) پروګرام یې د پوهنې وزارت د سلاکار او د دغه ولايت د پوهنې رياست د مسوولينو په حضور کې د کندهار ولايت د پنجوايي ولسوالۍ د جمراسي په لېسه کې پرانستله.
د دې ولايت د پوهنې مسوولينو د يادو ادارو له مرستو خوښي څرګنده کړه، خو د سیمې له مشرانو يې وغوښتل، چې له ښوونځيو سره دې هم ورته مرستې وکړي.
خوست:
د خوست ولايت د پوهنې رئيس مولوي سيد وسيم مليار د اسمعيل خېلو ولسوالۍ د زيړي ترخي لېسې د زده کوونکو د فراغت په مراسمو کې ګډون وکړ.  زده کوونکو یې زده کړو ته وهڅول او مولوي عبدالرشيد یې د يادې لېسې د نوي آمر په توګه معرفي کړ. او همدارنګه د ښوونځي هغه درې تنه استادان یې وستایل چې په ښوونځي کې يې يو کال له معاش پرته درس وکاوه.
لغمان:
د لغمان ولایت د پوهنې رئیس مولوي شاه جهان ساجد له یو پلاوي سره د دغه ولایت د الیشنګ ولسوالۍ د میا عبدالکریم بابا او میا دیري په ښوونځیو کې د "واش" له هغه پروګرام له تطبیق څخه څارنه وکړه، چې د یونیسف د ولایتي دفتر د ۷۹ زره افغانیو په لګښت سره جریان لري.
ننګرهار:
د ننګرهار د شهید محمد عارف لېسې د کرکټ لوبډلې په ۱۲ پړاویزه سیالۍ کې د ننګرهار د چکنوري لېسې لوبډلې سره مخامخ شوه، چې د شهید محمد عارف لېسې د کرکټ لوبډلې د ۱۶۹ منډو په اخیستو سره لوبه وګټله.