له مرکز او ولایاتو څخه د پوهنې لنډ خبرونه

کابل:
د کابل ولایت د سروبي ولسوالۍ د پوهنې آمر شکرالله حیدر د حاجر او یونیسف موسسو له استازو او همدارنګه د کابل د پوهنې ریاست د انجینري ټیم سره د لیدنې پر مهال او د پوهنې د ستونزو د حل په موخه د دې ولسوالۍ د پوهنې آمریت د استنادي دیوال له کار څخه څارنه وکړه.
پنجشیر:
د پنجشير ولايت د پوهنې رئيس مولانا غلام عصان حماس له خپلو کارکوونکو سره غونډه وکړه، چې په دې غونډه کې د١٤٠١ مالي کال د بودجې د څرنګوالي په باب يې له هغوى سره خبرې وکړې. او اړوندو مسوولینو ته یې لارښوونه وکړه، چې د خپلو اړوندو څانګو د مالي کال د څلورمې ربعې راپور ژر تر ژره چمتو او د پوهنې ریاست ته وسپاري.
لوګر:
د لوګر ولایت د پوهنې ریاست سکتوري غونډه د دغه ریاست د ښوونې او روزنې آمر مولوي عبیدالله هشام په مشرۍ جوړه شوه.
په دې غونډه کې د لوګر ولايت د پوهنې مسوولينو او د پوهنې له رياست سره مرستندویو ادارو مسوولينو د تيرې مياشتې خپل کاري رپوټونه او لاسته راوړنې یې وړاندې کړې او دراتلونکو پلانونو په باب يې خبرې وکړې.
هرات:
د "فتح او پیروزي " فوټبال کپ چې له دې وړاندې د هرات د انجیل ولسوالۍ د ښوونځیو د ۲۴ ټیمونو ترمنځ په لاره اچول شوی و، چې په پای کې د جمعیت فوټبال ټیم وتوانید چې د دغه کپ اتلولي خپله کړي.
 د دغه ولايت د ښوونې او روزنې آمر مولوي عبدالجليل مزمل د سپورت او ورزش پر ارزښت او ګټو یې خبرې وکړې او د دغو سياليو له تنظيموونکو يې مننه وکړه.
سرپل:
د سرپل ولایت د پوهنې رئیس د دې ولایت صیاد ولسوالۍ ته لاړ او د دې ولسوالۍ له ښوونکو او د پوهنې له مسوولینو سره یې د لیدنې پر مهال د هغوی ستونزې واورېدې او د مرستو ژمنه یې ورسره وکړه او له هغوی یې وغوښتل، چې د زده کوونکو ښې روزنې ته جدي پاملرنه وکړي. .