له ولایتونو څخه د پوهنې لنډ خبرونه.

بلخ:
د پوهنې وزارت د خصوصي زده کړو رئیس مولوي عبدالرحمن حمیدي له خپل ملګري پلاوي سره یو ځای د خصوصي دارالمعالمینونو د څېړنې او هغوی ته د بدیل د برابرولو په موخه بلخ ولایت ته سفر وکړ او د دغه ولایت د پوهنې له مسوولینو سره یې وکتل. يادو ادارو ته یې ډاډ ورکړ، چې د پوهنې وزارت مشرتابه له تاسو سره په هره برخه کې مرستو ته چمتو دی.
سمنګان:
د سمنګان ولایت د پوهنې رئیس مولوي نصرت الله فیضاني د دغه ولایت د پوهنې له نورو مسوولینو سره یو ځای د دره صوف پاین ولسوالۍ د ښوونځیو او مدارسو له اداري او تدریسي چارو څخه لیدنه وکړه او د پوهنې د کیفیت د ښه والي په موخه یې د پوهنې له مسوولینو سره وکتل.
همدارنګه:
د همدې ولايت د پوهنې رياست د عمومي زده کړو آمر ملا حکمت الله حنفي او ورسره مل پلاوي د ياد ولايت د يو شمېر ښوونځيو د ازموينې له بهير څخه د ليدنې پر مهال د يادو ښوونځيو اداري او تدريسي چارې یې هم وڅېړلې او د سمون په موخه یې لازمې لارښوونې ورته وکړې. 
جوزجان:
د جوزجان ولايت د پوهنې رياست د انجنيرۍ ټيم د دغه ولايت د اکتید موسسې له انجنيرانو سره په ګډه د دغه ولايت د خواجه دوکوه ولسوالۍ د سالتق ترکمنيه او چوباش افغانيه ښوونځيو د بیارغونې له چارو څخه څارنه وکړه.
د څارونکو د معلوماتو له مخې، په ښوونځيو کې چارې په ښه توګه پرمخ روانې دي او نږدې ۷۵ سلنه پرمختګ شوی دی.
سرپل:
د سرپل ولایت د سانچارک ولسوال مولوي فضل المنان عمري د دې ولسوالۍ د پوهنې له مسوولینو سره یو ځای د ارچتو د هلکانو له لېسې څخه د زده کوونکو د هڅونې او زده کړې په موخه لیدنه وکړه او د زده کوونکو د هڅو او فعالیتونو څخه یې مننه وکړه. نوموړي له ښوونکو وغوښتل، چې د ښوونې او روزنې په برخه کې باید جدي کار وکړي او خپل مسوولیتونه په ښه شکل سره ترسره کړي