دپوهنې وزارت د نظارت او ارزیابي ریاست له لوري د راپور ورکولو په برخه کې آنلاین کنفرانس پیل شو
د پوهنې وزارت د څارنې او ارزونې(نظارت او ارزیابي) ریاست د راپور ورکولو آمریت له لوري د هیواد د (۹) ولایتونو (ننګرهار، لغمان، کونړ، نورستان، زابل، پکتیا، پکتیکا، خوست او غزني) د پوهنې ریاستونو د راپور ورکولو مسئولینو ته آنلاین ورکشاپ پیل شو.
یاد ورکشاپ د آجنډا او روزنیز پلان سره سم د راپور ورکولو آمریت د آمر ډاکټر عاشق الله «هوشمند» له لورې په آنلاین/غیر حضوري ډول پیل شو.
د ورکشاپ په جریان کې د میاشتني (جدولي) راپور فارمټ، د ربعوار (تشریحي ) راپور فارمټ او د راپور ورکولو د طرزالعمل مهال وېش او سطحې په تفصیلي ډول تشریح او تر بحث لاندې ونیول شوې، دغه راز په یاد ورکشاپ کې د ترلاسه شویو راپورونو د کیفیت په اړه ستونزې په ګوته او د سمون په هکله یې لازمې سپارښتنې وشوې.
د ورکشاپ وروستنۍ برخه د ګډون والو پوښتنو ته ځانګړې شوې وه، چې د راپور ورکولو د مسئول له لوري په ترتیب سره ټولو ګډونوالو ته قانع کوونکي ځوابونه وړاندې شول.
د یادونې وړ ده، چې نوموړی آنلاین ورکشاپ به د ظرفیت لوړونې په موخه د هیواد د نورو ولایتونو د پوهنې ریاستونو د راپور ورکولو مسئولینو ته هم د ځانګړي مهال وېش سره سم وړاندې شي او دا لړۍ به د روانې اوونۍ تر پایه پورې دوام ومومي.
