د پوهنې وزارت د اسلامي زده کړو مرستیال وزیر فاریاب ولایت ته لاړ
د پوهنې وزارت د اسلامي زده کړو معین شیخ مولوي کرامت الله اخندزاده او ورسره پلاوی د دولتي او خصوصي مدرسو د ارزونې په موخه فاریاب ولایت ته ورسېد.
نوموړي په دغه سفر کې لومړی په هغه غونډه کې ګډون وکړ چې د والي او مرستیالانو، د پوهنې ریاست د رئیس او کارکوونکو، د جهادي لېسو ښوونکو او علماوو په کې ګډون درلود.
غونډه د څو مبارکو آیاتونو په تلاوت سره پیل شوه، ورپسې د دغه ولایت د پوهنې رئیس الحاج مولوي سید حفیظ الله معتصم بالله د پوهنې وزارت د اسلامي زده کړو معین ته ښه راغلاست ووایه.
ورپسې د پوهنې وزارت د اسلامي زده کړو معین شیخ کرامت الله اخندزاده د خپلې لارښوونې په ترڅ کې د مجاهدینو بریا او په هېواد کې د اسلامي نظام ټینګښت یې د خدای ج یوه ستره لورینه وبلله. ورپسې یې د خصوصي دیني مرکزونو رسمي کولو، د کمیت او کیفیت او د دولتي مدرسو د اداره کولو، د معیاري ښوونیز نصاب چمتو کولو، د یتیم خانو د زده کوونکو پالنه او روزنه او د فارغانو پر اسنادو یې رڼا واچوله او له مسوولینو یې وغوښتل، چې په دې برخه کې خپلې ټولې هڅې وکړي.
همدارنګه مسوولينو او استادانو ته یې لارښوونه وکړه، چې د خپل هېواد بچيانو ته داسې روزنه ورکړي، ترڅو د هېواد ملي او اسلامي ارزښتونو ته ژمن پاتې شي
د پوهنې معین د غونډې په پای کې د یتیم خانې یتیمانو سره یې د نغدي مرستې په ترڅ کې د پوهنې له مسوولینو سره په ګډه د فاریاب له فاروقیه جهادي مدرسې څخه لیدنه وکړه.
