د هیواد د ټولو مرکزي جهادي مدارسو، خصوصي مدارسو او دارالایتامونو څلورنیم میاشتنۍ ازموینې پای ته ورسېدې
د هیواد په ۲۸ ولایتونو کې د ټولومرکزي جهادي مدارسو، خصوصي مدارسو او دارالایتامونو څلورنیم میاشتنۍ ازموینې چې د تیرې اونۍ د شنبې په ورځ (۱۳/۲/۱۴۴۴هـ. ق) پیل شوې وې، د تیرې پنجشنبې په ورځ (۱۳/۲/۱۴۴۴هـ. ق) پای ته ورسېدې.
یادې ازموینې د پوهنې وزارت د اسلامي تعلیماتو د معینیت تر اشراف، سرپرستي او نظارت لاندې په تحریري بڼه واخیستل شوې، په ټول هیواد کې (۱۳۹۰۸) تنو زده کوونکو پکې برخه درلوده اوله پوره نظم، شفافیت او قوي مدیریت څخه برخمنې وې.همدارنګه په دارالهجرت کې د موجودو خصوصي مدارسو او دارالایتامونو ازموینې هم له یادو ازموینو سره هم مهاله واخیستل شوې.
د یادونې وړ ده، چې مرکزي جهادي مدارس د اسلامي امارت د زعیم امیرالمؤمنین شیخ هبة الله اخندزاده صاحب په ځانګړې لارښوونه، دپوهنې وزارت تر اشراف لاندې د هیواد په ۲۸ ولایاتو کې پرانیستل شوېدي، هره مدرسه د زر(۱۰۰۰) تنو زده کوونکو د ځایولو ظرفیت لري او په نږدې راتلونکې کې به د هیواد په پاتې ۶ ولایاتو کې هم پرانیستل شي.
