د پوهنې وزارت اړوند د ښوونکو څه د پاسه اووه زره(۷۰۰۰) بستونه ازادې سیالۍ ته وسپارل شول
د پوهنې وزارت اړوند د هیواد په شلو ولایاتو کې د ښوونکو او پنځم او شپږم اداري څه د پاسه اووه زره (۷۰۰۰) بستونه ازادې سیالۍ ته وسپارل شول.
هغه مراسم چې په همدې مناسبت د اسلامي امارت د اطلاعاتو اورسنیو په مرکز کې جوړ شوي وو، پکې د پوهنې وزارت د تضمین کیفیت معینیت سرپرست معین الحاج مولوي عبدالخالق صادق ، د یاد وزارت د استخدام رئیس مولوي بسم الله نعماني ، د چارو د ادارې د لوی ریاست رئیس مولوي احمدجان احمدي ، د اداري اصلاحاتو او ملکي خدماتو د ادارې رئیس مولوي عبدالحنان عارف الله او د ازموینو د ملي ادارې رئیس پوهاند عبدالقدیر خاموش ویناوې وکړې.
ټولو ویناوالو یاده پروسه د مسلکي او وړ ښوونکو د ګمارنې تر ټولو شفافه او غوره طریقه وبلله او زیاته یې کړه، چې د یادې پروسې په تطبیق سره به په هیواد کې د مسلکي ښوونکو د کمښت ستونزه تر ډېره بریده حل شي.
د یادونې وړ ده، چې د اعلان شویو بستونو مجموعي شمیر (۷۱۹۱) دی، چې له دې جملې څخه یې (۲۰۸۳)میرمنو او (۵۱۰۷)نارینه وو ته ځانګړي شویدي.
له ویلو دې پاتې نه وي، چې له دې وړاندې هم د پوهنې وزارت د هیواد په مرکز او اتو ولایاتو کې نږدې نهه زره(۹۰۰۰) بستونه ازادې سیالۍ ته سپارلي وو.
