د پوهنې وزارت سرپرست وزیر له عالیقدر امیرالمؤمنین سره ملاقات وکړ
د شنبې او یکشنبې په ورځو (۴-۵/۷/۱۴۴۳هـ ق) تر غرمې وروسته د پوهنې وزارت سرپرست وزیر شیخ القرآن والحدیث الحاج مولوي نورالله «منیر» صاحب او د یاد وزارت د ښوونې او روزنې معین الحاج مولوي سخاءالله«سعید» صاحب په کندهار ښار کې له عالیقدر امیرالمؤمنین شیخ هبة الله اخندزاده صاحب سره ملاقات وکړ.
په دې لیدنه کې ښاغلي وزیر صاحب د پوهنې وزارت اړوند وړاندیزونه او ستونزې له عالیقدر امیرالمؤمنین صاحب سره شریکې کړې او د ځينو موضوعاتو په اړه یې ورڅخه لارښوونې وغوښتلې.
عالیقدر امیرالمؤمنین د خپلو خبرو په ترڅ کې د هیواد په تعلیمي ډګر کې د پوهنې وزارت هلې ځلې وستایلې او څرګنده یې کړه، چې د اسلامي امارت مشرتابه په ټول توان سره د دیني مدارسو،عصري ښوونځیو او تعلیمي مراکزو د اکمال، تمویل او فعالولو په برخه کې په پوره جدیت سره کارکوي او خپل ټول امکانات او اسانتیاوې په کار اچوي.
