د  پوهنې  وزارت  سرپرست وزیر د ناروي هیواد له سفیر سر ه وکتل

نن ورځ دوشنبه (۱۴/۶/۱۴۴۳هـ ق ) له غرمې مخکې  د پوهنې وزارت د مقام په دفتر کې د پوهنې وزارت  سرپرست وزیر شیخ القرآن والحدیث الحاج مولوي نورالله(منیر) صاحب د ناروي هیواد له سفیر ( (Ole Andreas Lindeman  او مل هیئت سره   ملاقات وکړ. 
په دې ملاقات کې چې د یاد وزارت د دفتر لوی  رئیس  مولوي عبدالحکیم همت اخندزاده صاحب او د نړیوالو اړیکو او تمویل کوونکو  د ریاست رئیس استاد وحیدالله هاشمي صاحب هم حضور درلود، په هیواد کې د میرمنو د تعلیم، د استادانو د معاشاتو او تعلیمي نصاب په هکله مفصل بحث وشو.
د پوهنې سرپرست وزیر د خپلو خبرو په ترڅ کې وویل، چې کله د نجونو د تعلیم لپاره په کلتوري او دیني لحاظ یو مناسب چاپیریال برابر شي، اسلامي امارت  له اووم نه تر  دولسم ټولګي پوري  په رسمي ډول د هغوی د ښوونځیو پیل کولو ته ژمن دی.د تعلیمي نصاب په برخه کې یې یادونه وکړه، چې په نږدې راتلونکې کې د نصاب د تغیر لپاره کوم عملي اقدام په نظر کې نشته.البته  په خپل وخت به د معمول مطابق د نصاب د تعدیل او غني کولو لپاره زمینه مساعدوي. د استادانو د معاشاتو په برخه کې یې څرګنده کړه چې  د اسلامي امارت له راتګ وروسته د استادانو د څو میاشتو معاشات اجراء شویدي او د نورو میاشتو د معاشاتو د اجراء  لپاره هم کار  روان دی. 
د ناروي سفیر هم په خپل نوبت سره خبرې وکړې او د هیواد له تعلیمي نظام سره یې د هر ډول همکاري ژمنه وکړه .