بدخشان کې د یوه ښوونځي د جوړولو چارې پيل شوې
پوهنې وزارت،بدخشان: د بدخشان ولایت درواز ولسوالۍ کې د جامرچ د نجونو ښوونځي بنسټ ډبره، د سیمه ییزو چارواکو، د پوهنې ځايي چارواکو، د آقاخان سیمه ییز استازي، قومي مشرانو، ښوونکو او زده کوونکو په شتون کې کیښوول شوه.
د دې ښوونځي ودانۍ په پاخه او اساسي ډول په دوه جریبه ځمکه کې جوړیږي، چې ځمکه یې د خلکو او ډاکټر شریف سکندري لخوا پيرل شوې او د یاد ولایت معارف ته ډالۍ شوې ده.
دا ودانۍ به ۸ ټولګي، ۳ اداري خونې، ۱ د لابراتوار او ۱ د کمپيوټر ټولګی، د څښاک د اوبو څاه، د احاطې دیوال او نورې آسانتیاوې ولري، چې د آقاخان فرهنګي بنسټ لخوا د ۳۱۰ زره امریکايي ډالرو په لګښت جوړیږي.
د پوهنې ریاست د آقاخان فرهنګي بنسټ د سیمه ییز دفتر له مرستې او ملاتړ څخه مننه کوي چې تل مدام یې د ښوونځیو په جوړولو کې فعاله ونډه اخیستې او همداراز د سیمې له اوسیدونکو هم مننه کوي چې ځمکه یې پیرلې او هغه یې د ښوونځي جوړولو په پار معارف ته ډالۍ کړې.
