د پوهنې وزارت سرپرستې د خوست ولايت له والي سره ليدنه وکړه
پوهنې وزارت، کابل:د پوهنې وزارت سرپرستې آغلې رنګينې حميدي د خوست ولايت والي ښاغلي مومند کټوازي، شهزاده ځاځي، لطيف ژوندي او اسدالله احمدزي سره په خپل دفتر کې وکتل.
په دغې ليدنه کې د خوست والي په ياد ولايت کې د اصلاحاتو، پرمختګونو، د پوهنې برخې پر ستونزو او په ځانګړي ډول د ښوونې پر کيفيت، د درسي کتابونو پر کمښت، د مسلکي ښوونکو پر کمښت او نجونو لپاره د ښوونځيو نه شتون په اړه خبرې وکړې.
د پوهنې وزارت سرپرستې د پوهنې د پرمختګ په برخه کې د ياد ولايت د والي هلې ځلې وستايلې او مننه يې ترې وکړه او زياته يې کړه: له بده مرغه په ياد ولايت کې د پوهنې برخه کې لا هم ستونزې او خنډونه شته، خو د پوهنې وزارت به د يادو ستونزو حل ته ځانګړې پاملرنه کوي.
همداراز آغلې رنګينې حميدي زياته کړه: د پوهنې وزارت هڅه کوي څو ښوونې او روزنې ته د لاسرسي په برخه کې انډول په پام کې ونيسي.
د خوست والي د پوهنې وزارت له مشرتابه د مننې ترڅنګ ژمنه وکړه چې له ياد وزارت سره به، په ټولو برخو کې همکاري کوي او د ښوونې او روزنې برخه کې به خپلې هلې ځلې نه سپموي.
