په لوګر کې د ۲ ښوونځیو ودانۍ او د ۶ ښوونځیو د اوبو څاه ګانې ګټې اخیستنې ته وسپارل شول
د پوهنې وزارت، لوګر: د لوګر په خوښۍ ولسوالۍ کې د ۲ ښوونځیو نوې ودانۍ او د ۶ نورو ښوونځیو د پاکو اوبو څاه ګانې ګټې اخیستې ته وسپارل شول.
په دې تړاو جوړو شویو مراسمو کې والي عبدالقیوم رحیمي، د پوهنې رئیس سید عزیز احمد هاشمي، د کلیو، بیارغاونې او پراختیا رئیس انجینر اصغر ځاځي، د دولتي ادارو یو شمیر مسوولینو، دیني عالمانو او قومي مشرانو برخه اخیستې وه.
یاد ښوونځي او د اوبو څاه ګانې د کلیو، بیارغاونې او پراختیا وزارت د اقراء پروګرام له لارې د ۱۹،۵ میلیونه افغانیو په لګښت جوړې شوې دي.
په جوړ شویو ښوونځیو کې د خواجه لغوي او پاینده خیلو د نجونو او هلکانو د ښوونځيو ودانۍ او د ۶ نورو ښوونځیو د پاکو اوبو ژورې څاه ګانې شامل دي.
د نوموړو ښوونځیو د ودانیو په جوړېدو سره ۸ سوه زده کوونکو ته د زده کړو لازم ښوونیز چاپیریال برابر شو او هم د اوبو څاه ګانو په جوړولو سره د ۳ زره زده کوونکو د څښاک د پاکو اوبو ستونزه حل شوه.
د لوګر د پوهنې په برخه کې د اقراء پروګرام ۱۱۱ پروژې شته، چې په دغو پروژو کې د ۶۸ ښوونځیو ودانۍ او د ۴۳ نورو ښوونځیو اړین ملحقات جوړول شامل دي.
