د لوګر څلور ښوونکي په مډال او ستاینلیکونو وستایل شول
د پوهنې وزارت، لوګر: د لوګر ولایت څلور تنه نارینه او ښځینه ښوونکي د ولسمشر ښاغلي محمد اشرف غني په رالېږل شوي مډال او ستاینلیکونو وستایل شول.
د یادو ښوونکو د ستاینې په غونډه کې د پوهنې رئیس سید عزیز احمد هاشمي، د پوهنې ریاست کارکونکو او ستایل شوېو ښوونکو برخه اخیستې وه.
په ستایل شوېو ښوونکو کې د حضرت عمر فاروق (رض) د هلکانو لېسې ښوونکی میر محمد یونس، د کلنګار جهادي د هلکانو لېسې ښوونکی نعمت الله، د بي بي فاطمې او محمدآغې د نجونو لېسو دوه ښځینه ښوونکې شامل دي.
په یاده ستاینغونډه کې د حضرت عمر فاروق (رض) د هلکانو لېسې ښوونکي میر محمد یونس ته د ولسمشر له لوري د غازي میر بچه خان رالېږل شوی عالي دولتي مډال او پاتې دریو نورو ښوونکو ته د لومړۍ او دویمې درجې ستاینلیکونه ورکړل شول.
د لوګر د پوهنې رئیس سید عزیز احمد هاشمي د نوموړو ښوونکو پر ستاینې خوښي څرګنده کړه او ویې ویل، چې دا ښوونکي ولسمشر د ښه خدمت په بدل کې ستایلې دي.
هغه وویل، چې دغه ویاړ یواځې د یادو ښوونکو نه، بلکې د لوګر د ټولو ښوونکو دی او زیاته یې کړه، چې په راتلونکي کې به ځینې نور ښوونکي هم ورته وستایل شي.
د یادونې وړده، چې په تېرو کلونو کې هم د لوګر یو شمېر ښوونکي د ولسمشر او پوهنې وزارت له خوا په مډالونو او ستاینلیکونو ستایل شوي دي.
