د هلمند د حج او اوقافو ریاست د پوهنې ریاست ته د همکارۍ ډاډ ورکړ
د پوهنې وزارت، هلمند: د هلمند ولایت حج او اوقافو ریاست د هلمند پوهنې ریاست د ښوونکو د کمښت پوره کولو او همکاري کولو ډاډ ورکړ.
په هغه غونډه کې چې په همدې موخه د پوهنې ریاست د غونډو په تالار کې جوره شوي وه د حج او اوقافو رئیس محمد داؤد مدقق وویل چي د هلمند ولایت اړوند ښوونځیو کي د ښوونکو کمښت یوه لویه ستونزه ده او په دې برخه کي ټول هلمندي وګړي تر خپل وس او توان پوري مرسته وکړي تر څو زموږ ماشومان د زده کړو څخه بې برخي نه شي.
ښاغلي مدقق ډاډ وښود چې درانه علما دې ته حاضر دي چې ښوونځیو کې د ښوونکو په توګه دنده ترسره کړي.
د هلمند پوهنې رئیس محمد داؤد شاه صفاري د حج او اوقافو ریاست رهبرۍ څخه ځانګړې مننه وکړه چي دیني عالمان یې دې ته چمتو کړي تر څو د پوهنې ریاست سره په افتخاري ډول د ښوونکو په توګه دنده ترسره کړي.
ښاغلي صفاري همداراز د ټولو هلمندي ولسونو نه غوښتنه وکړه چي ماشومانو ته د زده کړي رسولو په برخه کې د هلمند پوهنې ریاست سره د ښوونکو د کمښت ستونزه هواره کړي او په خپله نژدې ښوونځۍ کې په افتخاري ډول د ښوونکي سپېڅلې دنده ترسره کړي.
د یادوني وړ ده، چې هلمند کې تر دې مهاله یو شمیر ځوانان او دیني عالمان دې ته چمتو شوي دي تر څو د ښوونکو د کمښت ستونزي د هوارۍ په موخه مرسته وکړي.
