قندهار کې د باالمقطع ښوونکو د ګمارنې په موخه آزموینه واخیستل شوه
د پوهنې وزارت، قندهار: د قندهار ډنډ ولسوالۍ کې د باالمقطع ښوونکو د ګمارنې په موخه له ۸۹۴ تنو نارینه او ښځینه کاندیدانو څخه د آزاد رقابت له لارې آزموینه واخیستل شوه.
په دغه آزموینه کې د نیمه لوړو زده کړو او لوړو زده کړو فارغانو ګډون کړی وو، چې د یوې رڼې پروسې په پایله کې به ۱۸۸ تنه د تدریسي رشتې مطابق وړ او مسلکي کسان د باالمقطع ښوونکو په توګه د یادې ولسوالۍ په ښوونځیو کې پر دندو وګمارل شي.
د قندهار د پوهنې ریاست د عمومی زده کړو آمر محمد طاهر ایوبي د معلوماتو له مخې به له دغو ۸۹۴ تنو څخه ۱۸۸ تنه وړ کسان د ډنډ ولسوالۍ اړوند په ښوونځيو کې د ښوونکو په توګه وګومارل شي، نوموړي د آزموینې ګډونوالو ته د آزموینې د شفافیت ډاډ ورکړ او زیاته یې کړه د دغو ښوونکو په ګومارنې سره به په ښوونځيو کې د ښوونکو د کمښت ستونزه هواره شي، ایوبی زیاته کړه چې د کندهار ولایت په نورو ولسوالیو کې هم د ښوونکو د ګومارنې پروسه پېل شي او په پام کې ده چې ۱۲۰۰ تنه باالمقطع ښوونکي به د قندهار ولایت اړونده ولسوالیو په ښوونځیو کې وګومارل شي.
