په کندهار کي نوی ښوونیز کال رسمآ پیل شو
په کندهار ولایت کي نوی ښوونیز کال په شاندارو مراسمو پیل شو او د ولایتي مسؤلینو لخوا د تعلیمي کال زنګ ووهل شو.
هغه مراسم چې په همدې موخه د زرغونې انا اول نمبر لیسې په جمنازیوم کي جوړ شوي وه د پوهنې د رئیس پوهنیار محب احمد روښان ترڅنګ د کندهار مرستیال والي فیصل شیرزی ، د ولایتی شورا رئیس حاجي سیدجان خاکریزول، ړ ولایتي شورا غړی عطالله عطا، په ولسي جرګه کې د کندهار د خلکو استازی سید مقتدا میران، د ملکي ادارو رئیسانو، مدني فعالانو، قومي مشرانو، د ښاري ښوونځیو آمرینو او مدیرانو، ښوونکو او په سلګونو زده کوونکو گډون درلود.
په پیل کي د پوهنې رئیس پوهنیار محب احمد روښان ګډونوالوته د ښه راغلاست ترڅنګ د نوي تعلیمي کال مبارکي ټول کندهار ولس او په خاصتآ ښوونکو او زده کوونکو ته وویل.
د پوهنې رئیس زیاته کړه که څه هم په کندهار کې د پوهنې بهير له ګڼو ستونزو سره مخ دی، خو بيا هم په تیر تعلیمي کال کې مو ډیري مهمې لاسته را وړنې درلودي لکه د نوي تشکیل ترلاسه کول، د اقرا برنامې د لاري د یو شمېر ښوونځيو د پاره د تعمیرونو جوړښت او د تدریسي کتابونو را انتقال هغه څه دي چي د پوهنیز بهیر د لا پياوړتیا په موخه ترسره شویدي.
د پوهنی رئیس په خپلو خبرو کي راتلونکي پلان ته په اشارې سره وویل هڅه به وکړو ترڅو هغه بستونه چي نوي اعلان ته ځي وړ او مسلکي کدرونه پکښي استخدام کړو په لیري پرتو ولسوالیو کي به د ولس په همکارۍ تعلیمي مراکز فعال کړو ترڅو د هغه سیمو د ماشومانو د پاره هم د زده کړي زمینه برابره شي دغه راز به د اقرا برنامې د لاري د نورو هغو ښوونځيو د پاره چي لا اوس هم تعمیرونه نلري د جوړیدو چاري راپيل کړو، د دیني زده کړي کتابونه د وزارت مقام لخوا تر چاپ لاندي او کندهار ته به هم را انتقال شي .
د کندهار مرستیال والي فیصل شیرزي غونډي ته په خپله وينا کي، دپوهني پرمختګ وستايه او د پوهنیز بهیر د کیفیت او کمیت د لوړیدا په برخه کې د ولایت مقام په استازیتوب د هر ډول همکارۍ ډاډ ورکړ.
په غونډه کي د کندهار ولايتي شورا رئیس حاجي سید جان خاکریزوال، د ولسي جرګې غړي سید مقتدا میران هم خبري وکړې او د خپلو ویناوو پر مهال یې د پوهني وزارت او د کندهار پوهني رياست د مسئولينو څخه غوښتنه وکړه، چي په ښوونځيو کې دي د پوهنې کيفيت ته پاملرنه زیاته کړي.
دوی پر خلګو ږغ وکړ چی خپل اولادونه هغه که نارینه وي یا ښځینه ښوونځیو ته واستوی ترڅو دعلم د ستر نعمت څخه برخمند شي.
