پوهنې وزارت د دندو او جوړښت د اصلاح لپاره سمپوزیم ترسره کوي
پوهنې وزارت- کابل: پوهنې وزارت د لمړي ځل لپاره د دې وزارت په جوړښت او دندو کې د زده کوونکي پراساس د اصلاحاتو رامنځ ته کولو په موخه، سمپوزیم تر سره کوي.
په دې سمپوزیم کې چې د ۱۳۹۸ لمریز کال د مرغومي د میاشتې په دریمه اونۍ کې تر سره کیږې، د (پوهنې، جمهوري ریاست چارو ، د ملکي خدمتونو او اداري اصلاحاتو کمسیون، د مدني ټولنو بنسټونو استازي، د ښوونې او روزنې متخصصان، د لوړو زده کړو، مالیې، کلیو پراختیا، ښځو چارو، کار او ټولنیزو چارو، مخابراتو، اترا، مهاجرینو او راستنیدونکو وزارتونو استازي، د کوچیانو، د ښوونځيو شوراګانو استازي، دینې عالمان، د پوهنې وزارت د پراختیا شریکان، د ښوونځيو مدیران، ښوونکي، تکړه زده کوونکي او مور او پلار) ګډون کوي.
د پوهنې دندو او جوړښت د اصلاحاتو په لمړني سمپوزیم کې چې د دریو ورځو لپاره په کابل کې تر سره کیږي، اړین مسايل لکه: د پوهنې وزارت د اساسي دندو جوړول او پیژندل، د ولایتونو، ولسوالیو، ښوونځيو او مرکزي ادارو په کچه د مدیریتي دندو تعریف، د مرکزي کچې څخه ولایتونو، ولسوالیو او ښوونځيو ته د واک ورکول، د پوهنې وزارت د مشرتابه، کړنلارو او څارنې دندو ټاکل، د مرکز له کچې څخه تر ښوونځي پورې د پوهنې وزارت د تشکیلاتي جوړښتونو جوړول، د پوهنې وزارت په چوکاټ او تشکیلاتو کې د اسلامي زده کړو او د سواد زده کړو ځای او د ښوونکې روزنو لوړول، د ښوونځي په کچه د کتابونو د خپرولو او ویشلو د مدیریت څرنګوالۍ، په پوهنې وزارت کې د ښوونیز نصاب د مدیریت څرنګوالۍ تر بحث لاندې نیول کیږي.
د دې سمپوزیم د تر سره کیدو څخه وړاندې، د یادو ادارو استازي به د شپږو ۶ کاري ډلو (جوړښت او دندې، نصاب او ښوونکي روزنه، سیستمونه، مالي اصلاحات، اسلامي زده کړو، عمومي زده کړو او سواد زده کړو) په چوکاټ کې منظمې غونډې تره سره کوي او پرې بحث کوي.
په دې سمپوزیم کې د ټولو ګډون کوونکو نظرونه او وړاندیزونه د کاري ډلو له لوري ټولېږي او د هغه له مخې د ښوونې او روزنې دندو او جوړښت د تغیر لپاره به پریکړه کیږي.
پوهنې وزارت د بازار د اړتیاوو پر اساس د هیواد ښوونیز نظام د اصلاح لپاره ژمن دۍ او په دې توګه خپل عملي اقدامات له ټولو سره شریک کوي.
