د روان لمریز کال له پیل څخه تر اوسه په کابل ښار او ولایت کې ۱۶۵۰ تنو ښوونکو ته پور ویشل شوی دی
پوهنې وزارت_کابل: د روان لمریز کال له پیل څخه تر اوسه په کابل ښار او ولایت کې ۱۶۵۰ تنو ښوونکو ته پور ویشل شوی او په هرات ولایت کې ۲۰۰ تنو ښوونکو د قرضې صندق نوې لایحې مطابق، د پور اخیستلو فورمې ترلاسه کړې دي.
اوس مهال ښوونکو لپاره د قرضې صندوق د کابل ښار ولایت او هرات ولایت کې فعالیت لري او د روان کال تر پایه به د دې صندوق فعالیتونه په بلخ او ننګرهار ولایت کې هم پیل شي.
په ۱۳۹۹ لمریز کال کې به د ښوونکو لپاره د قرضې صندوق فعالیتونه په خوست، کندهار او بدخشان ولایتونو کې هم پرانیستل شي.
په روان لمریز کال کې د ښوونکو لپاره د قرضې صندوق مالي اندازه ۸۵ ملیونه افغانیو ته رسیدلې ده او دا پیسې به د غوښتونکو ښوونکو د خدمت کولو مودې په اساس هر کال د اوږدې مودې قسطونو په شکل ویشل کیږي.
ویشل شوې پور به د کال په اوږدو کې د بانک کمیشن اخیستلو نه بغیر په میاشتنې ډول د ښوونکو له معاش څخه ګرځول کیږي.
د یادونې وړ ده چې د ښوونکو لپاره د قرضې صندوق په ۱۳۳۹ لمریز کال کې جوړ شوی او د یاد صندوق د لایحې نوې کولو وروسته د ښوونکو لپاره د قرضې ورکړه ۸۰ سلنه زیاته شوې ده.
