خوست کې د ښوونځیو پاک ساتلو او زده کوونکي او د پاکوالي کلتور سره د اشنا کیدو په اړه یو ورځینۍ ورکشاپ دایر او یو شمېر ښاري ښوونځیو ته د نظافت لوازم وویشل
د خوست ښاروالۍ ریاست په تالار کې د (UNDP)مؤسسې له لوري د اتو ښاري ښوونځیو یو شمېر زده کوونکو او په دغه ښوونځیو کې د نظافت کمیټې مسوولو معلمینو ته په دې ورکشاپ کې د خپل ښوونځي د پاک ساتلو ، د ښاري فرهنګ سره د زده کوونکو د بلدتیا او همدا رنګه د پلاستیک د زیانونو په اړه روزنه ورکړل شوه.
ددې ورکشاپ د پرانیستې پر مهال خوست ښاروال انجینر عبد البصیر محمدزي وویل، مکاتب د فرهنګ د انتقال ځایونه دي زموږ زده کوونکي باید د ښاري فرهنګ سره بشپړه اشنایي پیدا کړي، او د ښار په پاک ساتلو کې خپل رول ادا کړي.
د پوهنې ریاست د شوراګانو مدیر محمد یونس اهنګر د ورکشاپ ګډون والو په خپلو خبرو کې وویل، د پوهنې ریاست ژمنتیا دا ده چې په ټولو ښوونځیو کې دا ډول برنامې پلي کړي ترڅو زده کوونکي د پاکوالي کلتور سره کامله اشنایي پیدا کړي.
وروسته د یادې موسسې مشاور او ددې ورکشاپ ټرینر خلیل مومند ګډون والو ته د ورکشاپ پر اهمیت خبرې وکړې او ژمنه یې وکړه د خوست په ټولو ښوونځیو کې د ښاروالیو کمیټې جوړې کړي او په دې برخه کې به دوی هر راز همکارۍ ته داوم ورکوي.
تر څنګ د ښاروالۍ ریاست د کلتوري خدمتونو مدیر لمر نیازي ګډون والو د پلاستیک د زیات استعمال د زیانونو په اړه هر اړخیز معلومات وړاندې کړل او د پلاستیکو د کم استعمال په لارو چارو یې دوی ته سیمینار وړاندې کړ.
په پای کې اتو ښاري ښوونځیو ته د مکتب ساتلو ټول لوازم ورکړل شول او تر څنګ یې د ورکشاپ ګډون والو تصدیق نامې هم وویشل شوې.
