کابل ښار کې د یو ښوونځي ودانی ګټې اخیستنې ته وسپارل شوه
د پوهنې وزارت، کابل: د کابل ښار اړوند د اتمې تعلیمي حوزې اړوند د شهید عبدالصبور فرید د ښوونځي نوې ودانۍ د یو لړ مراسمو په ترڅ کې د کابل ښار د پوهنې رییس ډاکتر احمد ضمیر ګوارا او د پوهنې وزارت د یوشمیر مسوولینو لخوا په داسې حال کې چې د فاطمې د خیریه بنسټ رئیسه، قومي مشرانو او استادانو ګډون درلود پرانیستل شوه.
یاده ودانی په پاخه او اساسي ډول د فاطمې خیریه بنسټ په مرسته جوړه شوي، چې ۶ درسي ټولګي، میز او څوکۍ او نورې اړینې آسانتیاوي لري، چې د دغه ودانۍ جوړېدو سره زده کوونکو ته د زده کړو لازم ښوونیز چاپیریال برابر شو.
د کابل ښار د پوهنې رییس احمد ضمیر گوارا د ښوونځي له جوړېدو خوښي وښوده او د فاطمې د خیریه بنسټ رئیسې او همکارانو څخه یې د ښوونځي د جوړیدو له امله مننه وکړه او ژمنه یې وکړه، چې د اړونده ښوونځي او نورو ښوونځیو د ستونزو د حل په موخه د اړونده ادارو په همکاری او د وزارت د رهبرۍ سره په همغږۍ جدي هلې ځلې وکړي.
