چین له پوهنې وزارت سره، د کرونا پر وړاندې د مبارزې په برخه کې مرسته کوي
د پوهنې وزارت، کابل: د پوهنې وزارت سرپرستې آغلې رنګینې حمیدي د چین جمهوریت له سفیر، وانګ یو سره ولیدل.
دا لیدنه چې دوشنبه د زمری په ۲۷مه د دلکشا په ماڼۍ کې جوړه شوې وه د ولسمشر د دفتر رییس ښاغلي محمد شاکر کارګر هم پکې ګډون درلود.
د چین هېواد سفیر ښاغلي وانګ یو د پوهنې وزارت لخوا د ښوونځیو د پیلېدو له طرحې ملاتړ وکړ او ویي وویل، چین د افغانستان له پوهنې وزارت سره د کرونا پر وړاندې د مبارزې په برخه کې ۱۰ ملیونه ماسکونه مرسته کوي، او دا لړۍ به ادامه لري تر څو د افغاسنتان په بیلابیلو ولایتونو کي زده کوونکي ورڅخه ګټه واخلي.
د پوهنې وزارت سرپرستې آغلې رنګینې حمیدي او ښاغلي محمد شاکر کارګر د چین هېواد له مرستو او همکاریو مننه وکړه او زیاته یې کړه چې د دوی همکاري د کرونا پر وړاندې د مبارزې په برخه کې اغیزمن کیدی شي.
