پکتیا کې د ۴۶،۵ میلیونو افغانیو په ارزښت څلور پوړیزه لیلیې وداني ګټې اخستنې ته وسپارل شوه
د پوهنې وزات، پکتیا: د پکتیا ولایت د ګردیز ښار اړوند د غازي ببرک ځدراڼ عالي لېسې په انګړ کې دزده کوونکو لپاره څلور پوړیزه ودانۍ جوړه او د یو لړ مراسمو په ترڅ کې د پکتیا والي محمدحلیم فدایي، د ولایتي شورا ریس عبدالمالک مجاهد ځاځي، د پوهنې رییس استاد کوچي ځاځي، د ګڼو بېلابېلو ادارو رییسانو، قومي مشرانو او ځوانانو له خوا د پټۍ په پریکولو سره ګټې اخیستنې ته وسپارل شوه.
په هغه غونډه کې چې په همدې موخه جوړه شوي وه د پکتیا والي محمد حلیم فدایي په خپلو خبرو کې د یادې ودانۍ جوړونه یوه لویه لاسته راوړنه یاده کړه او زیاته یې کړه: په علم کې درې مهم اساسات دې. علم زده کول او تر نورو یې رسول، سالم فکر روزل او پر علم عمل کول دي کله چې موږ او تاسو د علم په برخه کې دا دري اساسات په سمه توګه ترلاسه کړل نو د ټولنې اوسنۍ شته ناخوالې به په خپله حل شي.
دغه راز ښاغلي والي په خپلو خبرو کې د ستر غازي ببرک خان ځدراڼ پر ژوند او د هغه په کارنامو هم خبرې وکړې او ياد غازي یې د هېواد په خپلواکۍ اخيستلو کې د تاريخ ځلانده ستوری ياد کړ.
همداشان د پکتیا د پوهنې رییس استاد کوچي ځاځي د جوړو شویو مراسمو ګډونوالو ته په خبرو کې وویل: د خوښۍ ځای دا دی، چې نن ورځ مونږ یو ځل بیا په دې و توانېدو چې د ستر غازي ببرک خان ځدراڼ په عالي لیسه کې یو بل د انسان روزنې او انسان پېژندنې ګلبڼ جوړ کړو او دغه هیله نه یواځې ما بلکې د هر پکتیاوال د زړه ارمان ؤ. پوهنې ریس زیاته کړه: د ښوونځیو جوړولو څخه زمونږ موخه په خپلو ولسونو احسان کول نه دي، بلکې دا مونږ د یو مسؤلیت له مخې د ځان فرض ګڼو.
یاده څلور پوړیزه ودانۍ په پاخه او اساسي ډول په څلورو پوړونو کې د پوهنې وزارت له پرمختیایی بودجې څخه د ۴۶،۵ میلیونو افغانیو په مجموعي لګښت جوړه شوي، چې ټولې (۷۲) خونې او نورې اړینې اسانتیاوې لري، چې د ۲۸۸ تنو زده کوونکو ګنجایش لري.
