پوهنې وزیر ډاکتر بلخي د کابل ښار پوهنې ریاست څخه لیدنه وکړه

پوهنې وزارت- کابل: پوهنې وزیر ډاکتر محمدمیرویس بلخي د مدیریتي میکانیزم ښه والي او زیانمنو برخو پیژندنې په موخه د یاد وزارت له مختلفو برخو څخه د لیدنو په ترڅ کې دا ځل په ناڅاپي ډول د کابل ښار پوهنې ریاست څخه لیدنه وکړه.
د دې لیدنې په ترڅ کې پوهنې وزیر د کابل ښار پوهنې ریاست له مختلفو برخو لکه تدریسي معاونیت، نظارت، شهادتنامو، معلوماتي تکنالوژي او د مراجعینو څواب ویلو او لارښوونې برخو څخه لیدنه وکړه.
ډاکتر بلخي په ناڅاپي ډول د کابل ښار پوهنې ریاست مراجعینو مینځ کې حاضر او له نژدې يې د خلکو کارو ته د رسیدنې چارې او د یاد ریاست کارکونکو د کار څرنګوالي په موخه څارنه وکړه او د مخکیني لیدنې په پرتله يې راغلي اصلاحات وڅيړل.
پوهنې وزیر ډاکتر بلخي د خلکو سره د خبرو وروسته د مراجعینو چارو ته د ښه رسیدو په موخه د کابل ښار پوهنې ریاست کارکونکو ته لازم هدایتونه ورکړل.
د پوهنې وزارت مشرتابه د اصلاحاتو راوړلو، د مدیریت ښه والي او پراختیا او د شفافه او ځواب ویونکي سیستم قوي کولو په موخه به د یاد وزارت له مختلفو برخو څخه لیدنه وکړي.