پوهنې وزارت کې د دیني علومو د آزموینې ممتاز زده کوونکي وستایل شول
د ديني علومو هغه آزموينه چې څه موده وړاندې د پوهنې وزارت د دعوت او ارشاد رياست لخوا، د یاد وزارت د مرکزي هستې له شاوخوا ۳ زرو تنو کارکوونکو څخه اخيستل شوې وه، نن يې پايلې د يو لړ مراسمو په ترڅ کې د پوهنې وزارت د مسئولينو له خوا اعلان شوې.
یاد مراسم د کلام الله مجید د څو مبارکو آیتونو په تلاوت سره پیل شول، چې پکې د دغه وزارت د دعوت او ارشاد رئیس مولوي جمعه خان سروري، یو شمېر ادارې مسئولینو او کارکوونکو حضور درلود.
د پوهنې وزارت د دعوت او ارشاد رئيس وويل، د یادو سياليو څخه يې اساسي موخه، د ديني او فقهي مسايلو په اړه د کارکوونکو د پوهاوي د کچې لوړول دي او زیاته یې کړه چې زموږ برياليتوب په ديني زده کړو کې نغښتی دی.
همدارنګه نوموړي هوډ څرګند کړ، چې د کارکوونکو د علمي ظرفیتونو د لوړولو دغه لړۍ به همداسې دوام ولري او په دې اړه به ډېر ژر منسوبینو ته په پښتو او دری ژبو یو ښوونیز کتاب چمتو شي.
د غونډې په پای کې ۱۸ تنه هغه ممتاز کارکوونکي چې په یاده آزموینه کې یې لوړې نمرې اخیستې وې، په ډالیو وویاړل شول.
