پوهنې وزارت مشرتابه د وکیل شاه خان څخه چې خپله ځمکه یې د نجونو ښوونځي د جوړولو لپاره ورکړه، ستاینه وکړه
پوهنې وزارت- کابل: پوهنې وزیر ډاکتر محمدمیرویس بلخي او د مشرتابه یو شمیر غړو د وکیل شاه خان څخه چې خپله ځمکه یې د نجونو ښوونځي جوړولو لپاره ورکړه ستاینه وکړه.
دا غونډه چې د پوهنې وزارت په کوربتوب ترسره شوه، ډاکتر بلخي د خوست ولایت په تڼی ولسوالۍ کې د نجونو زده کړو لپاره د وکیل شاه خان له پاملرنې او د پوهنې له ملګرتیا څخه خوښي وښوده.
وکیل شاه خان په دې غونډه کې وویل چې د هغه په سیمه کې د نجونو ښوونځي لپاره هیڅ ځمکه نه وه او د خپل احساس له مخې یې د نجونو ښوونځي لپاره خپله ځمکه ورکړه.
د یادونې وړ ده چې وکیل شاه خان د خوست ولایت په ټنی ولسوالۍ کې د پنځو ۵ میلیونه افغانیو په ارزښت خپله شخصي ۲ جریبه ځمکه د نجونو ښوونځي جوړولو لپاره یې د پوهنې وزارت ته وسپارله.
