په کندهار زون کې د مدرسینو د مسلکي وړتیاوو لوړولو په موخه سیمینار جوړ شو
د پوهنې وزارت له لوري د کندهار زون مدارسو د مدرسینو مسلکي وړتیا لوړولو لپاره ۶ ورځنی روزنیز سیمینار ترسره شو.
په یاد سیمینار کې د پوهنې وزارت د دارالعلومونو رئیس محترم مولوي عبدالقدوس قدوسي او پوهنې رئیس سربېره یو شمېر چارواکو او د کندهار، هلمند، ارزګان او زابل ولایتونو استاذانو ګډون درلود.
د سیمینار د پرانیستې په مراسمو کې د کندهار ولایت پوهنې محترم رئیس وویل:"مدارس د یو ملت د معنوي ودې بنسټونه دي. موږ باید نه یوازې د هغوی کمیت ته، بلکې د هغوی کیفیت ته هم ځانګړی پام وکړو. مدرسین باید خپل مسلکي مهارتونه او د تدریس طریقې لاپسې پیاوړې کړي، ترڅو طلاب په دیني او عصري علومو دواړو برخو کې عالي شخصیتونه شي."
همدارنګه د پوهنې وزارت د دارالعلومونو محترم رئیس د مدرسینو رول او مسئولیتونه تشرېح او هغوی ته یې مهمې سپارښتنې وکړې.
نوموړي ټینګار وکړ چې دغه ډول سیمینارونه باید دوام ومومي، ترڅو د تدریس کیفیت پر ښه کولو سربېره، د مدرسینو علمي کچه هم لوړه شي.
