په پکتیکا ولایت کې د ۲۵۲ مېلیونه افغانیو په لګښت د یو شمېر ښوونځیو ودانیزې او بیارغونې چارې دوام لري
د پکتیکا ولایت د پوهنې ریاست په یوه خبرپاڼه کې راغلي، چې د یاد ولایت په مرکز او ولسوالیو کې د ۱۵ بابه ښوونځیو د ودانیو چارې ۷۰ سلنه پرمخ تللي او په راتلونکو څو ورځو کې به ګټې اخیستنې ته وسپارل شي.
د يادونې وړ ده، چې د يادو ښوونځيو پر جوړولو ټولټال ۱۹۲ مېليونه افغانۍ لګښت راځي.
همدارنګه د ياد ولايت په مرکز او ولسواليو کې د يو شمېر ښوونځيو د بيارغونې او ترمیم چارې هم د ٦٠ مېليونه افغانيو په لګښت بشپړېدو ته نږدې دي او د يو لړ مراسمو په ترڅ کې به ګټې اخيستنې ته چمتو شي.
د ياد ولايت پوهنې رئيس مولوي عبدالوکيل خالد وويل، په دغو پروژو کې د نويو درسي ټولګيو رغول، احاطوي دېوالونو جوړول او د نورو برخو ترميم شامل دی، چې مالي لګښت يې د پوهنې د یو همکار بنسټ له لوري تمویلېږي.
