په پنجشېر ولایت کې له م.جاهدینو څخه د سويې د تثبيت آزموینه واخيستل شوه
د پنجشېر ولایت پوهنې ریاست د افغانستان.ا.ا. له ۸۰۰ تنو م.جاهدینو څخه د هغوی د سويې د تثبیت په موخه آزموینه واخيستله. د یاد ولایت پوهنې رئیس مفتي حبیب الله نوري قتاده، د م.جاهدينو د زحمت او سرښندنې د ستاينې په ترڅ کې په ډاګه کړه، چې دوى د جهادي بوختياوو له امله د خپلو زده کړو له دوام څخه پاتې شوي وو. ورپسې د پنجشېر ولايت د مقام دفتر رئيس د یادې آزموينې د ترسره کولو له امله د پوهنې وزارت له مشرتابه څخه مننه او قدرداني وکړه او ټينګار يې وکړ چې د دغه ولايت مقام تل د پوهنې د پراختيا په برخه کې همکاري کوي. دغه راز د پوهنې مسئولينو د آزموينې د بهير د روڼتیا ډاډ ورکړ او ويې ويل، چې په آزموينه کې بريالي شوي کسان به د ښوونځيو په يوولسم او دولسمو ټولګيو کې شامل شي.
