په ننګرهار کې د ماشومانو د حقونو نړیوال کنوانسیون دېرشمه کلیزه ونمانځل شوه

د پوهنې وزارت_ننګرهار: د ننګرهار ولایت د پوهنې ریاست او یونیسبف له لوري د ماشومانو د حقونو نړیوال کنوانسیون دېرشمه کلیزه د یوې ځانګړې غونډې په لړ کې د ننګرهار په عالی لیسه کې ونمانځل شوه.
د پوهنې رئیس حسیب الله شینواري د خپلې وینا پر مهال وویل چې زموږ په ټولنه کې لا هم د ځینو کورنیو له خوا کوچنیان رټل کېږي او ان کله کله له فزیکي چلند سره مخ کېږي، چې دا کار د ماشوم په رواني حالت بده اغېزه ښندي.
ښاغلي شینواري پر کورنیو او والدینو غږ وکړ چې پر خپلو کوچنیانو دې تشدد او زور زیاتی نه کوي او د مینې په فضا کې دې سالمه روزنه ورکړي.
ورپسې د یونیسیف د تعلیمې برخې مسوولې انیتا حیدري او عزیز نور هم د ماشومانو په ښې روزنې او پالنې ټینګار وکړ او ویې ویل چې افغان ماشومان په روان جګړه ییز حالت کې ذهني سکون ته اړتیا لري چې دا کار والدین، ښوونکي او روزنیز مرکزونه ترسره کولای شي.
ددې کلیزې د نمانځنې په موخه کوچنیانو ته د تفریح لپاره د کرکټ لوبه هم جوړه شوې وه او پر دې سربېره یوه تمثیلي ټوټه هم وړاندې شوه چې خلکو ته یې پر ماشومانو د تشدد او وهلو ټکولو پر مخنیوي ټینګار کاوه.
د ماشوم حقونو نړیوال کنوانسیون هغه سند دی، چې د ماشومانو د ښوونیزو، ټولنیز، سیاسي، اقتصادي، روغتیایي او کلتوري حقوق ټاکي.
دغه کنوانسیون د ۱۸ کلن نه د ټیټ عمر انسان د «ماشوم» نومولی.
د ماشومانو د حقونو کنوانسیون چې د ماشومانو د حقونو اړوند ۵۴ مادې لري په کال ۱۹۸۹ کې د ملګرو ملتونو غړو هیوادونو له خوا لاسلیک شو او ټول هغه هیوادونه چې دغه کنوانسیون یې لاسلیک کړی، ددې د تطبیق مکلفیت لري.
افغانستان په کال ۱۹۹۴ کې دغه کنوانسیون لاسلیک کړ او رسما یې په تطبیق کې غړی هیواد شو.