په میدان وردګ کې د ښوونکي ورځ ولمانځل شوه
د پوهنې وزارت_میدان وردګ: د میدان وردګ ولایت د پوهنې ریاست له لوري د ښوونکي نړیواله ورځ د یو لړ خاصو مراسمو په ترڅ کې ولمانځل شوه.
په هغه غونډه چې په همدې موخه جوړه شوي وه دمیدان وردګو والي جنرال مظفر الدین یمین ، ولایتي شورا رئیس او غړو، امنیه قوماندان، ادارو رییسانو او مامورینو، قومي مشرانو، ښوونکو، زده کوونکو، ځوانانو او خویندو ګډون کړی و.
د غونډې په پیل کې دپوهنې رئیس دوکتور محمد سعید منصور ټولو ګډونوالو ته دښه راغلاست تر څنګ دښوونکو په نماینده ګی هر اړخیزه وینا وکړه او دښوونکو په نوم د لوی چوک، دښوونکو لپاره دښارګوټو جوړولو او توزیع کولو وړاندیز یې وکړ.
دپروګرام په لړ کې دمیدان وردګو والي جنرال مظفر الدین یمین، ولایتي شورا رئيس الحاج اخترمحمد طاهري او امنیه قوماندان مل پاسوال محمد وییس صمیمي په خپلو خبرو کې د ښوونکي اهمیت، اړتیا او مقام په اړه ویناوې وکړې، دغه راز یې ښوونکی د ټولنې او هېواد یو صادق او ریښتنی خدمتګار یاد کړ.
همداراز د زده کوونکو لخوا د ښوونکي مقام، اهمیت او په ټولنه کې د ښوونکي د اړتیا په پار بېلابېلې ترانې او مقالې ولوستل شوې
دپروګرام په پای کې دولایت مقام او پوهنې ریاست لخوا دټولو ښوونکو په نماینده ګی ۳۰ ښوونکي تقدیر او تشویق کړل همداراز دولایت مقام له لوري دپوهنې رئیس دوکتور محمد سعید منصور ته دپوهنې په برخه کې دښو کړنو او لاس ته راوړنو په اساس دعزت پګړی ور په سر کړل شوه.
