په لغمان ولایت کې د ۷۳ تنو حافظانو د فراغت لمانځنې مراسم ترسره شول
د لغمان ولایت الینګار ولسوالۍ د مخزن العلوم له دارالعلوم څخه ۷۳ تنه د قرآن کریم حافظان د یو لړ پرتمینو مراسمو په ترڅ کې فارغ شول.
په یادو مراسمو کې د دغه ولایت پوهنې رئیس مولوي شاه جهان ساجد، دیني علماوو او قومي مشرانو ګډون درلود.
د لغمان پوهنې رئیس فارغانو او د هغوی کورنیو ته د مبارکۍ ویلو په ترڅ کې، د قرآن عظیم الشان د حفظ او د دیني علومو د فضیلت په اړه خبرې وکړې او له حافظانو څخه یې وغوښتل، ترڅو د نوي نسل په روزنه کې خپل دیني او ملي مسئولیت ترسره کړي.
ورپسې د دیني مدارسو نورو محترمو علماوو هم فارغانو ته د فراغت مبارکي وویله او فارغانو ته یې د خلکو او ټولنې په وړاندې د خپلو راتلونکو مسئولیتونو په اړه معلومات ورکړل.
یاد مراسم په ممتازو زده کوونکو د ستاینلیکونو په وېشلو او د هېواد لپاره د خیر د دعائیې په لوستلو سره پای ته ورسېدل.
