په لغمان ولایت کې د یوه ښوونځي ودانۍ ګټې اخیستنې ته وسپارل شوه
د هېواد د پوهنې له نظام سره د خلکو د همکارۍ په دوام دا ځل، د لغمان ولایت الیشنګ ولسوالۍ د احمد خان د لومړني ښوونځي نوې ودانۍ، د پوهنې د یو تن دوست شخصیت میر افغان صافي په شخصي لګښت، د یو لړ هغو مراسمو په ترڅ کې چې پکې د یاد ولايت د والي او مشرتابه پلاوي سربېره د پوهنې رئيس، علماوو او عامو خلکو ګډون درلود؛ ګټې اخیستنې ته وسپارل شوه.
د یاد ولایت والي الحاج قاري زین العابدین عابد د عامه ځایونو جوړولو ته په اشارې سره زیاته کړه: یاد ښوونځی زموږ د ګران هېواد د پوهنې د یوه دوست شخصیت په مالي ملاتړ د ۳ میلیونه افغانیو په لګښت جوړ شوی دی، بې له شکه چې دا د نوموړي لپاره صدقه جاریه حسابیږي او موږ یې د دغه نېک کار له امله ستاینه او هرکلی کوو.
ورپسې د لغمان پوهنې رئیس مولوي شاه جهان ساجد د موضوع په اړه د خبرو پر مهال د ټولنې په اصلاح او پرمختګ کې د پوهنې د ګټو په اړه خبرې وکړې او ویې ویل، د یاد لومړني ښوونځي ودانۍ څلور درسي ټولګي، یوه اداري خونه له نورو اړینو ملحقاتوسره لري، چې په پینځه جرېبه ځمکه کې په پاخه او اساسي ډول سره جوړه شوې ده.
نوموړي له زده کوونکو وغوښتل، چې د ياد ښوونځي د تجهيزاتو ساتنې ته جدي پاملرنه وکړي او له خلکو یې وغوښتل، ترڅو د ښوونيزو پروګرامونو څخه دملاتړ په برخه کې خپلو همکاریو ته دوام ورکړي.
