په غزني ولایت کې د ۲ بابه ښوونځیو زدهکوونکي د څښاک پاکو اوبو له اسانتیاوو برخمن شول
د غزني ولایت اندړو ولسوالۍ اړوند په پناه منځني ښوونځي او علي هجوري عالي لېسه کې، د ښوونځیو شوراګانو په همکارۍ د څښاک پاکو اوبو دوه څاګانې تر کیندلو وروسته ګټې اخیستنې ته وسپارل شوې.
د یاد ولایت پوهنې چارواکو په ټینګار سره وویل چې په ښوونځیو کې د څښاک پاکو اوبو شبکو فعالول نه یوازې د ناروغیو مخه نیسي، بلکې د زدهکړې او تعلیمي پروسې لاښه والی په برخه کې اساسي نقش لري.
د ښوونځیو شوراګانو هم ژمنه وکړه چې د تعلیمي خدماتو لاپیاوړتیا لپاره به خپلې هڅې جاري وساتي، ترڅو زدهکوونکي په ارامه فضا کې خپلو زدهکړو ته دوام ورکړي.
