په غزني ولایت کې د یوې دیني مدرسې ودانۍ لپاره د بنسټ ډبره کېښودل شوه
د غزني ولایت مرکز اړوند « د سراج العلوم » په نوم د یوې دیني مدرسې د ودانۍ لپاره د بنسټ ډبره، د یاد ولایت د پوهنې ریاست مشرتابه، دیني علماوو او قومي مخورو په حضور کې کېښودل شوه.
د پوهنې مسئولين وايي: د يادې مدرسې ټول لګښت څه باندې ۳ ميليونه افغانۍ اټکل شوى، چې د حاجي نورمحمد د متدینې او علم پرورې کورنۍ له لوري تموېلیږي.
د غزني ولايت د پوهنې رئيس الحاج مولوي مير نصير احمد حسيني وويل: یاده علم پروره کورنۍ غواړي، چې د دغه ديني مدرسې ودانۍ په ۳ جرېبه ځمکه کې کوم چې د سيمې د اوسېدونکو له خوا پوهنې ریاست ته وقف شوې ده، په دوو پوړونو کې چې ۱۲درسي ټولګي، یوه اداري خونه، یو محراب جومات، د پاکو اوبو څاه او نور اړین محلقات به ولري، جوړه کړي.
د پوهنې رئیس په ویناء، د یادې ودانۍ په جوړېدو سره به د غزني ښار شاوخوا ۳۰۰ تنو ماشومانو ته د زده کړې مناسب چاپېریال برابر شي.
