په غزني ولایت کې د یوې دیني مدرسې او ښوونځي د بنسټ ډبره کېښودل شوه
د غزني ولایت په مقر ولسوالۍ کې د یوې دیني مدرسې لپاره د بنسټ ډبره، د یاد ولایت د پوهنې ریاست مشرتابه، دیني علماوو او قومي مخورو په حضور کې کېښودل شوه.
د یاد ولایت پوهنې رئیس الحاج مولوي میر نصیر احمد حسیني وویل: د ابو هریره«رضی الله عنه» مدرسې او شهید عبدالغیاث لېسې د بنسټ ډبره د یو همکار بنسټ په مالي مرسته کېښودل شوه او ټاکل شوې، چې د جوړېدو چارې یې په راتلونکو پینځو میاشتو کې بشپړې شي.
د نوموړي د څرګندونو له مخې: دغه دوه بابه ښوونیز بنسټونه شاوخوا د ۷ ميليونه افغانيو په لګښت له ټولو اړینو ملحقاتو سره جوړېږي.
ورپسې دیني علماوو هم د اسلام له نظره د علومو په تړاو خبرې وکړې او د پوهنې وزارت له پروګرامونو او پلانونو یې خپل مادي او معنوي ملاتړ اعلان کړ.
