په سرپل ولایت کې د ۱۵ بابه ښوونځيو لپاره شین چاپېریال رامنځته شو
د پوهنې وزارت له لوري د یو همکار بنسټ په ملاتړ د ٢١ زره امريکايي ډالرو په لګښت، د سرپل ولايت په ١٥ بابه ښوونځيو کې شین چاپېریال رامنځته او د زده کوونکو لپاره ګټې اخستنې ته چمتو شو.
د یادو باغچو د پرانیستې په مراسمو کې د پوهنې رئیس، د کرنې او مالدارۍ ریاست استازو، د مرستندویه بنسټونو مسئولینو او یو شمېر قومي مشرانو ګډون کړی وو.
په پیل کې د سرپل ولایت پوهنې رئیس مولوي محمد رحماني د یاد مرسته کوونکي بنسټ له پرله پسې همکاریو څخه د مننې ترڅنګ، د دغه ولایت په ښوونځیو کې د شین او تازه چاپېریال د رامنځته کولو له امله قدرداني وکړه او زیاته یې کړه، چې په ښوونیزو بنسټونو کې د شنې او تازه فضاء شتون د زده کوونکو پر فکري ودې او زده کړې مثبته اغېزه لري.
د پوهنې رئيس د يادو ښوونځيو له مسئولينو وغوښتل، تر څو د باغونو او زينتي نيالګيو په ساتنه او پالنه کې جدي هڅې وکړې.
