په دایکنډي ولایت کې د ۵۷ بابه ښوونځیو اړوندو مسئولینو لپاره روزنیز سیمینار جوړ شو
د دایکنډي ولایت کجران ولسوالۍ اړوندو ښوونځیو د ۵۷ تنو علمي غړو، آمرینو او اداري مدیرانو لپاره د "ارزونې، پلان جوړونې او راپور ورکولو لارښود" تر سرلیک لاندې یو ورځنی سیمینار، د یاد ولایت پوهنې چارواکو په حضور کې ترسره شو.
د سیمینار په پیل کې د دایکنډي پوهنې رئیس محترم الحاج مولوي شیر محمد صدیقي د اداري کاري پروسې، د اسلامي احکامو او فرمانونو پلي کولو، نبوي«صلی الله علیه وسلم» صورت او سیرت او مراجعینو سره د دې ادارې د کارکوونکو ښه چلند او اخلاقو باندې ټینګار وکړ او روښانه یې کړه چې د دغه پروګرام اساسي موخه د پوهنې منسوبینو د اداري چارو د وړتیا او کیفیت ښه کول دي.
د یادونې وړ ده چې دغه روزنیز پروګرام د پوهنې وزارت د کارکوونکو چارو لوی ریاست په نوښت او د اداري اصلاحاتو او ملکي خدمتونو ریاست په همکارۍ پیل شوی او تر دې دمه د هغه ولایت په اشترلي، سنګتخت، خدیر، کیتي او کجران ولسوالیو کې دښوونځيو له ۲۰۰ تنو څخه زیاتو چارواکو لپاره په بریالیتوب سره پلی شوی دی.
