په جوزجان ولايت کې د يو باب ښوونځي د جوړولو چارې پيل شوې
د جوزجان ولایت د عبدالحکیم قهرمان لېسې رغونې چارې، د پوهنې رئیس، دیني علماوو او مشرانو په ګډون د یو لړ مراسمو په ترڅ کې پیل شوې.
د یاد ولايت پوهنې رئیس الحاج مولوي محمدطاهر جواد وايي : د دغې لېسې ودانۍ ۶ درسي ټولګي ، ۲ اداري خونې او نور اړین ملحقات لري، چې په دوو درسي ساعتوکې به د ١٥٠٠ تنو زده کوونکو ظرفيت ولري.
د پوهنې د رئیس په وينا، د يادې لېسې پر ترميمولو ټولټال دوه ميليونه افغانۍ لګښت راځي، چې د یوه خیریه بنست له لوري ورکول کېږي.
دغه ودانۍ په داسې حال کې جوړېږي، چې د يادې لېسې څه د باندې ۳۰۰۰ زده کوونکي د زده کړې له خوندي چاپېریال څخه بې برخې ؤ.
په ورته مهال، د جوزجان اوسېدونکي په خپله سیمه کې د یاد ښوونځي له جوړېدو خوښي څرګندوي او وايي: د دغه ښوونځي په جوړېدو سره به د دوی ماشومانو ته د زدهکړې خوندي چاپېریال برابر او د زدهکوونکو لپاره به د ودانۍ د کمښت ستونزه هم حل شي.
