په تخار ولایت کې د یوې لېسې نوې ودانۍ پرانیستل شوه
د تخار ولایت چاه آب ولسوالۍ د خلیان عالي لېسې نوې ودانۍ چارې بشپړې، او د یو لړ مراسمو په ترڅ کې، چې پکې د پوهنې ریاست پلاوي، دیني علماوو، مشرانو او د سیمې خلکو ګډون درلود، ګټې اخیستنې ته وسپارل شوه.
یاده ودانۍ په دوه جرېبه ځمکه کې ۸ درسي ټولګي، يوه شنه ساحه او ځينې نور اړین ملحقات لري، د شاوخوا ۸۶۰ زره افغانیو په لګښت سره چې د سيمې د خلکو او د یاد ولایت د یوه سوداګر عبدالله خواجه له لوري ورکړل شوی، جوړه شوې ده.
د پوهنې رئيس الحاج مولوي حزب الله مبشر، د يادې ودانۍ د پرانيستنې په مراسمو کې، په انساني ژوند کې د پوهنې د ارزښتناک رول په اړه خبرې وکړې او د هېواد د پوهنې له نظام څخه يې د ملاتړو بنسټونو او خلکو د همکاریو څخه د مننې او هرکلي ترڅنګ، له هغوی وغوښتل، چې خپل اولادونه زده کړو ته وهڅوي؛ تر څو د هېواد په پرمختګ کې خپل ملي او اسلامي رول ولوبوي.
نورو ويناوالو هم د يادې لېسې په جوړېدو خوښي څرګنده او د تخار چاه آب ولسوالۍ د پوهنې مينه والو او علم دوستو خلکو څخه يې مننه او قدرداني وکړه.
