په تخار ولایت کې د یوه ښوونځي نوې ودانۍ ګټې اخيستنې ته وسپارل شوه
د تخار ولایت په چاه آب ولسوالۍ کې د ګدا محمد خان د منځني ښوونځي نوې ودانۍ، د ياد ولایت د یوه ملي سوداګر خواجه عبدالله په شخصي لګښت جوړه او د پوهنې ریاست مشرتابه، ديني علماوو او د سيمي خلکو په ګډون د یو لړ مراسمو په ترڅ کې ګټې اخيستنې ته وسپارل شوه.
د ياد ښوونځي ودانۍ د ۳ميليونه افغانيو په لګښت سره په دوه جرېبه ځمکه کې چې ۹ درسي ټولګي، یوه اداري خونه له اړينو ملحقاتو سره لري، د شاوخوا ۴۰۰ زده کوونکو ظرفیت لري.
د تخار پوهنې رئيس او نورو ويناوالو د هېواد د ياد ملي سوداګر د هېوادپالنې له احساس څخه مننه او قدرداني وکړه او د پوهنې د بنسټونو جوړول يې د صدقه جاریه کارونو څخه وبلل.
دغه راز نوموړي د ياد ښوونځي پر ساتنې د ټينګار تر څنګ، له ځايي اوسېدونکو وغوښتل، چې خپلو ماشومانو ته د ښوونې او روزنې په لاره کې لازمې لارښوونې وکړي.
